Të paktën 15 persona janë vrarë në përleshjet mes forcave irakiane të sigurisë dhe mbështetësve të klerikut të fuqishëm shiit në kryeqytetin, e Bagdadit.
Zyrtarët thonë se dhjetëra të tjerë u plagosën pasi protestuesit besnikë të Moqtada al-Sadr sulmuan pallatin presidencial. Dhuna filloi pasi Sadr njoftoi tërheqjen e tij nga politika.
Blloku i tij në tetorin e kaluar fitoi shumicën e vendeve në parlament, por ai ka refuzuar të negociojë me grupet shiite të mbështetura nga Irani për ta formuar qeverinë, raporton BBC.
Si rezultat, ka pasur një vit paqëndrueshmërie politike. Luftimet në rrugë shpërthyen gjatë natës, ndërsa luftëtarët shkëmbyen të shtëna me armë zjarri. Pjesa më e madhe e luftimeve është përqendruar rreth Zonës së Gjelbër të qytetit, një zonë që strehon ndërtesa qeveritare dhe ambasada të huaja. Stafi i ambasadës holandeze u detyrua të transferohej në misionin gjerman për shkak të përplasjeve.
Zyrtarët e sigurisë thanë se një pjesë e dhunës ishte midis Brigadave të Paqes, një milici besnike ndaj Sadr, dhe anëtarëve të ushtrisë irakiane. Videot e shpërndara në mediat sociale dukej se tregonin disa luftëtarë duke përdorur armatim të rëndë, duke përfshirë granata me raketa (RPG).
Mjekët thanë se 15 mbështetës të Sadr ishin qëlluar për vdekje dhe rreth 350 protestues të tjerë u plagosën, sipas agjencisë së lajmeve AFP.