Të shtëna me armë zjarri janë dëgjuar të martën mbrëma në rrugën “Maliq Pashë Gjinovci” në Prishtinë, ku si pasojë dyshohet se një person është plagosur.
Incidenti ka ndodhur rreth orës 22:40, pranë një hoteli në zonë.
Rastin për Dukagjinin e ka konfirmuar zëdhënësi i Policisë së Kosovës, Daut Hoxha, i cili ka bërë të ditur se një person i dyshuar tashmë është arrestuar, ndërsa dyshohet se ka edhe të tjerë të përfshirë.
“Po, sonte rreth orës 22:40 është pranuar informata për të shtëna me armë në afërsi të një hoteli në Prishtinë. Menjëherë janë njoftuar të gjitha njësitë në terren dhe pas dy-tre minutash njësitet policore rajonale për reagim të shpejtë janë përgjigjur rastit. Ato kanë dalë në vendin e ngjarjes dhe kanë njoftuar se kanë hasur në një person të plagosur, si dhe një person tjetër, i cili ka qenë duke ikur, dhe të njëjtin e kanë ndaluar dhe arrestuar. Dyshohet se ka edhe persona të tjerë të përfshirë në këtë rast dhe policia është në proces të ndërmarrjes së veprimeve të tjera operative dhe hetimore për të sqaruar të gjitha rrethanat e tjera,” ka deklaruar Hoxha, për Dukagjinin.
Policia është duke vazhduar hetimet për të sqaruar rrethanat e incidentit dhe për t’i identifikuar personat e tjerë të përfshirë në këtë ngjarje.