Teoricieni i mirënjohur botëror Francis Fukuyama i ka dhënë mbështetje kryeministrit të Kosovës Albin Kurti, në lidhje me konfrontimet e fundit apo situatave tensionuese në raport me Serbinë.
Përmes një postimi në Twitter, Fukuyama ka thënë se kryeministri Kurti e meriton mbështetjen.
“Kam takuar kryeministrin e Kosovës, Albin Kurtin, në Athinë muajin e kaluar. Ai meriton mbështetje në konfrontimin e tij aktual me Serbinë”, ka shkruar ai në Twitter.
Francis Fukuyama është teoricien, ekonomist politik, shkencëtar politik dhe shkrimtar.
Fukuyama është i njohur për librin e tij “Fundi i Historisë dhe Njeriu i Fundit”, në të cilin argumenton se historia duhet parë si një proces evolucionar, dhe se fundi i historisë në këtë kuptim, është demokracia liberale, pra kjo është forma përfundimtare e qeverisjes për të gjitha kombet.
Në takimin e tyre në samitin e Athinës të organizuar nga “The Economist”, Kurti e kishte njoftuar teoricienin Fukuyama për zhvillimet ekonomike dhe progresin në Kosovë.
Po ashtu, kryeministri Albin Kurti e kishte ftuar Fukuyaman që ta vizitojë Republikën e Kosovës.