Deputeti i Lidhjes Demokratike të Kosovës (LDK), Avdullah Hoti, ka reaguar lidhur me tërmetin që ka goditur Tajvanin.
Hoti ka thënë se në këto momente qëndrojnë afër tyre dhe luten për ta.
Deputeti nga radhët e kësaj partie ka thënë se qëndrojnë pranë institucioneve të Tajvanit dhe ka shprehur ngushëllime për familjarët e viktimave.
“Tërmeti i rëndë në Taiwan ka lënë disa të vdekur e të lënduar dhe dëme të mëdha materiale”, ka shkruar Hoti.
Një tërmet me magnitudë 7.4 ballë të Rihterit i ka goditur sot brigjet lindore të Tajvanit, duke lënë së paku shtatë persona të vdekur, ndërsa janë lënduar 763 të tjerë. Këto të dhëna vazhdimisht po përditësohen pasi ka akoma njerëz që janë të bllokuar poshtë rrënojave të ndërtesave.
Lexo më shumë: Tajvan: Shtatë të vdekur dhe 763 të tjerë të lënduar nga tërmeti i fuqishëm
Pas valës së parë goditëse janë shkaktuar edhe disa termete të tjera të fuqishme, duke shkaktuar një paralajmërim për cunami për Japoninë jugore dhe Filipinet, raporton CNN, përcjellë Dukagjini.
Qeveria e Tajvanit ka njoftuar se katër persona kishin vdekur në qarkun lindor malor, me popullsi të rrallë të Hualien, afër vendit ku ishte epiqendra, me më shumë se 50 të plagosur.
Departamenti i zjarrfikësve ka thënë se të paktën 26 ndërtesa janë shembur, më shumë se gjysma në Hualien, megjithëse në një nga ato më të dëmtuara 22 persona u shpëtuan dhe vetëm një i humbur.