Një takim joformal i udhëheqësve të Ballkanit Perëndimor do të zhvillohet këtë të hënë në Tiranë.
I pranishëm në këtë mbledhje pritet të jetë edhe komisionari i Bashkimit Evropian për Fqinjësi dhe Zgjerim, Oliver Varheyli.
Ky takim do të shërbejë si përgatitje për samitin e Procesit të Berlinit, që do të mbahet në kryeqytetin e Shqipërisë më 16 tetor.
Kryeministri i Shqipërisë, Edi Rama, vendi i të cilit sivjet kryeson Procesin e Berlinit, ka paralajmëruar takimin joformal gjatë turneut të tij nëpër shtetet e Ballkanit Perëndimor, pak ditë më parë.
Ky takim është thënë se ka për qëllim diskutimin dhe koordinimin për të hartuar kërkesa të përbashkëta, për t’i paraqitur në samitin e tetorit, ku pritet të marrin pjesë udhëheqës të vendeve të Bashkimit Evropian, raporton rel.
Në këtë takim nuk dihet se a do të marrë pjesë kryeministri i Kosovës, Albin Kurti. Marrëdhënia e e tij me kryeministrin Rama është ftohur kohëve të fundit, për shkak të zhvillimeve në Kosovë.
Në vizitën e fundit të Ramës në Kosovë, kryeministri Kurti nuk ka pranuar që ta takojë atë.