Ukraina ka intensifikuar sulmet me dronë ndaj rafinerive dhe infrastrukturës së eksportit të naftës në Rusi, duke goditur sektorin më të rëndësishëm të ekonomisë së presidentit Vladimir Putin. Sipas analistëve, këto veprime synojnë të tregojnë aftësinë e Kievit për t’u kundërpërgjigjur në një kohë kur Shtetet e Bashkuara po përpiqen të ndërmjetësojnë një marrëveshje paqeje.
Sulmet kanë shkaktuar ndërprerje të përpunimit të naftës dhe eksporteve, duke sjellë mungesa të benzinës në disa rajone të Rusisë. Ato vijnë si kundërpërgjigje ndaj avancimeve të forcave ruse në vijën e frontit dhe sulmeve të Moskës mbi gazin dhe infrastrukturën energjetike të Ukrainës.
Goditjet e fundit kanë synuar 10 impiante të naftës, duke ndërprerë rreth 17 për qind të kapacitetit të përpunimit të rafinerive ruse, që përkthehet në 1.1 milion fuçi naftë në ditë, sipas llogaritjeve të Reuters përcjell Dukagjini.
Kjo ka ndikuar ndjeshëm në ekonominë ruse të luftës, duke shkaktuar jo vetëm ndërprerje të prodhimit, por edhe rritje të çmimeve të karburanteve.
Sulmet ndodhin në një periudhë kur kërkesa për benzinë në Rusi është në kulm, për shkak të sezonit turistik dhe nevojave të fermerëve. Edhe para tyre, Moska kishte kufizuar eksportin e benzinës për të përmbushur kërkesën e brendshme, por pas goditjeve situata është përkeqësuar, duke sjellë mungesa në jug të Rusisë dhe në territoret ukrainase të kontrolluara nga forcat ruse.
Në përpjekje për të kompensuar humbjet, Rusia ka rritur eksportet e naftës bruto, duke orientuar më shumë sasi drejt tregjeve të jashtme, në një kohë kur SHBA po i shtyn Kinën dhe Indinë të ulin blerjet e tyre nga Moska.
Sulmet e Kievit kanë dhënë një goditje të fortë në zemrën e ekonomisë së Kremlinit, duke dëmtuar përpunimin dhe eksportet e naftës, si dhe duke sjellë krizë të furnizimit me karburante brenda vetë Rusisë.