Pjesëtarët e shërbimit të inteligjencës mbrojtëse të Ukrainës po zhvillojnë një operacion kundërofensiv pranë qytetit Pokrovsk, me synim rivendosjen e linjave kryesore logjistike në zonë, raportojnë mediat ukrainase UNN dhe korrespondenti i The Economist, Oliver Carroll.
Sipas Carroll, inteligjenca ushtarake ukrainase ka nisur një kundëofensivë të guximshme për të rimarrë kontrollin mbi pikat strategjike logjistike pranë Pokrovskut. Ai publikoi një video ku shihet një helikopter UH-60 Black Hawk duke u ulur në një fushë dhe duke zbritur ushtarë ukrainas, përpara se të largohej përsëri. Burime të UNN kanë konfirmuar autenticitetin e videos dhe zhvillimin e operacionit.
Footage of Ukraine’s GUR conducting an air assault with its UH-60 Black Hawks to retake the main supply route into Pokrovsk. pic.twitter.com/9Kf5YQy7Kh
— OSINTtechnical (@Osinttechnical) October 31, 2025
Presidenti ukrainas Volodymyr Zelensky ka pranuar se situata në Pokrovsk mbetet e vështirë, por ka theksuar se qyteti është ende nën kontrollin e forcave ukrainase. Ai hodhi poshtë raportimet për rrethimin e trupave të Ukrainës, duke i cilësuar si dezinformata të ngjashme me ato që ishin përhapur gjatë operacionit në Kursk.
Pokrovsku, një qytet me rreth 60 mijë banorë para luftës, shtrihet në një rrugë strategjike që lidh disa qendra të rëndësishme në rajonin e Donetskut, duke përbërë një pjesë kyçe të mbrojtjes ukrainase në lindje. Rënia e këtij qyteti do ta afronte Rusinë me synimin e saj afatgjatë për pushtimin e plotë të zonës.