Komisioneri për Zgjerimin dhe Fqinjësinë e Mirë të Bashkimit Evropian, Oliver Varhelyi, në fjalën e tij në Samitin e “Ballkanit të Hapur”, në Ohër të Maqedonisë së Veriut, ka ftuar edhe Bashkimin Evropian të jetë pjesë e kësaj nisme rajonale.
Sipas tij, kjo iniciativë mund të jetë shans për përshpejtimin e rrugës drejt Bashkimit Evropian.
“E marr këtë ftesë si një ftesë që BE të jetë pjesë e këtij procesi. Mendoj se kjo iniciativë nuk është vetëm e mirë dhe se të gjithë e mbështesin, por ajo është mundësi me të cilën përballet rajoni në dekada të tëra. Normalisht, mund të jetë mundësi për përshpejtimin e rrugës drejt BE-së, dhe do të duhet të përshpejtohej edhe integrimi real i rajonit në BE”, ka thënë ai.
Sipas tij, ky samit është dëshmi që BE-ja duhet të përshpejtojë aderimin e vendeve të Ballkanit Perëndimor.
“Procesi, i cili po zgjatet, nuk është diçka pozitive as për qytetarët e BE-së dhe as për ata të Ballkanit Perëndimor. Të jem i sinqertë me ju, kjo nuk është interesante për njerëzit, qytetarët tanë, të BE-së ose të Ballkanit Perëndimor, sepse vlerësoj se pyetja e tyre kyçe është, kur do të jetojmë siç jetojnë në Evropë, kur do t’i kemi mundësitë e njëjta, ekonomike, shoqërore siç i kanë njerëzit e BE-së, dhe kur do të përjetojmë që të gjitha barrierat të eliminohen mes BE-së dhe BP”, shtoi ai.
Komisioneri foli edhe për marrëveshjet, të cilat priten të nënshkruhen mes liderëve të pranishëm, duke thënë që “integrimi fillon me ekonominë dhe shoqërinë”.
“Ky është integrimi i vërtetë, i cili fillon me ekonominë dhe shoqërinë”, ka thënë ai.
Ai ka potencuar se projekti i kësaj ideje nënkupton implementimin e katër lirive themelore evropiane në rajonin e Ballkanit Perëndimor.
Këto katër liri kanë të bëjnë me lëvizjen e mallrave, njerëzve, kapitaleve dhe shërbimeve.