Në objektin e Gjykatës në Mitrovicë, janë hasur mbishkrime me përmbajtjen “Albin Zajednica”, të mërkurën e 22 marsit.
Në raportin-24 orësh të policisë, rasti është cilësuar si “Vandalizëm”.
Sipas njoftimit të policisë, mbishkrimet dyshohet të jenë shkruar nga katër persona.
Rasti po vazhdon të hetohet.
“Në objektin e gjykatës janë vërejtur disa mbishkrime me përmbajtje “Albin Zajednica”. Pas shikimit të kamerave të sigurisë është vërejtur se këto mbishkrime janë shkruar nga 4 të dyshuar meshkuj kosovarë. Rasti është duke u hetuar”, thuhet në njoftim.
Ndryshe, Partia Socialdemokrate e Kosovës (PSD), si aksion simbolik për kundërshtimin e Asociacionit, kanë shkruar në muret e Ministrisë së Kulturës, Rinisë dhe Sportit fjalët “Albin Zajednica”.
Sipas kësaj partie, Asociacionin “Zajednicë” e ka pagëzuar Albin Kurti.
“Në VV të gjithë ishim kundër Asociacionit, përveç Kurtit siç duket”, ka thënë Zgjim Hyseni, nënkryetar i PSD-së.
Sipas tij, Asociacioni paraqet ndarje etnike dhe është i dëmshëm.
“Asociacioni që paraqet ndarje etnike është në vetvete i dëmshëm, por Kurtit i duhej patjetër një fjalë serbe. Kjo sepse Kurtit nuk i interesonin dëmet e Asociacionit, por çfarë mund të përfitojë përmes sulmit që i bëhet kundërshtarëve politikë. Kështu, Asociacioni u pagëzua ‘Zajdenicë’. Zajednica është momenti kur Kurti shkëputet prej të vërtetës. Është vegla mohuese e pushtetit si qëllim në vetvete”, ka thënë Hysni, shkruan EO.
“Sot që Asociacionin po pret ta zbatojë vetë, e kemi një tjetër akrobacion gjuhësor: Asociacioni është vetëmenaxhim”.
“Asociacionin ‘Zajednicë’ e ka emëruar Kurti. Paradoksalisht, ‘Zajednica’ po bëhet mbiemri i vetë Albinit”.