Pas vërshimeve në disa fshatra të komunës së Gjilanit, të cilat kanë shkaktuar dëme, ka reaguar kryetari i kësaj komune, Alban Hyseni, duke apeluar te qytetarët të mos hedhin mbeturina në shtretërit e lumenjve si dhe në hapësira publike.
Kjo sepse sipas tij po bllokohet rrjedha e ujit të lumenjve.
“Ju bëjmë apel të gjithë qytetarëve që të mos hedhin mbeturina në shtretërit e lumenjve dhe hapësira publike, si pasojë e të cilave po bllokohet rrjedha e ujit të lumenjve”, ka shkruar Hyseni.
Hyseni ka bërë të ditur se pavarësisht nga masat e marra nga komuna e Gjilanit, për parandalimin e vërshimeve, reshjet e mëdha kanë bërë që të ketë dalje të ujit nga shtrati i “Lumit Stanishor”.
“Pavarësisht masave preventive të ndërmarra në parandalimin e vërshimeve, për shkak të reshjeve të mëdha dhe bllokimit te shtratit të lumit nga mbeturinat, dje kemi pasur dalje të ujit nga shtrati i lumit Stanishor në disa lokalitete, ku uji ka depërtuar edhe në oborret e disa shtëpive dhe bodrumet e tyre”, ka shkruar Hyseni.
Ai po ashtu ka theksuar se “Drejtoria për Mbrojtje dhe Shpëtim dhe ekipi i Njësisë Profesionale të Zjarrfikësve dhe Shpëtimit, kanë dalë në zonat e prekura nga vërshimet dhe kanë bërë pastrimin e mbeturinave.
“Drejtoria për Mbrojtje dhe Shpëtim dhe ekipi i Njësisë Profesionale të Zjarrfikësve dhe Shpëtimit, që nga orët e hershme të mëngjesit kanë dalë në zonat të cilat janë prekur nga vërshimet dhe kanë intervenuar në pastrimin e disa pikave nga mbeturinat. Me të marrë lajmin, kemi aktivizuar komisionin për vlerësimin e dëmeve nga fatkeqësitë natyrore dhe ata janë në proces të shqyrtimit të dëmeve të shkaktuara”, ka theksuar ai.