Drejtori i Emergjencave në Prishtinë, Lulzim Fushtica, ka bërë të ditur se ka pasur 15 intervenime në pika të ndryshme të kryeqytetit.
Në emisionin “Rreth e rrotull” të RTV Dukagjini, Fushtica ka deklaruar se pikat më problematike mbesin stacioni i autobusëve në Prishtinë dhe te ura në Shkabaj. Te kjo e fundit, siç tregon Fushtica, dy qytetarë janë shpëtuar pasi veturat kishin ngecur në ujë.
“Si pasojë e reshjeve dhe motit ekstrem që ka kapluar jo vetëm kryeqytetin, por gjithë Kosovën, ka pasur vërshime të lokalizuara në disa pika në kryeqytet. Vlen të theksohet se ne me marrjen e informatës, jemi në bashkëpunim me Institucionin Hidrometerologjjik, këtë informatë e kemi marrë me kohë dhe kemi filluar të marrim përgatitjet paraprake. Të hënën është mbledhur edhe ekipi, të gjitha drejtoritë, ka filluar pastrimi i shtretërve të lumenjve, i pusetave atmosferike, e kanalizimeve…kemi pasur 15 intervenime në kryeqytet, dy pika kanë qenë më problematike që përsëriten dhe do të zgjidhen shumë shpejt. Është pika te stacioni i autobusëve ku zakonisht me vite të tëra kemi problem dhe kemi pasur edhe në një pikë në Shkabaj, tek ura, ku kemi bërë shpëtimin e dy veturave me qytetar brenda me ndihmën e zjarrfikësve dhe Policisë së Kosovës”, ka treguar ai.
Ndërkaq, eksperti i emergjencave, Tahir Ahmeti, ka thënë se Instituti Hidrometerologjik kishte dhënë alarmin për reshje, si rrjedhojë e të cilave, Fushtica tha se masat ishin marrë tashmë.
Nga vërshimet e shiut, vendet më të prekura ishin kryeqyteti, Vushtrria dhe Podujeva.