Video të verifikuara që po qarkullojnë nga Irani tregojnë trupa të pajetë të grumbulluar në një spital, snajperë të pozicionuar mbi çatitë e ndërtesave dhe shkatërrimin e kamerave të sigurisë, pas shtypjes së ashpër të protestave antiqeveritare në fillim të këtij muaji.
BBC ka ndjekur përhapjen e protestave në mbarë Iranin që nga shpërthimi i tyre në fund të dhjetorit, por ndërprerja pothuajse totale e internetit e vendosur nga autoritetet e ka bërë shumë të vështirë dokumentimin e shkallës së reagimit të dhunshëm të shtetit.
Sipas Agjencisë Amerikane të Lajmeve për Aktivistët e të Drejtave të Njeriut (HRANA), janë konfirmuar rreth 6 mijë të vrarë, përfshirë mbi 5,600 protestues. Agjencia thotë se po heton edhe rreth 17 mijë raste të tjera të raportuara, pavarësisht bllokadës së internetit.
Ndërkohë, organizata “Iran Human Rights”, me seli në Norvegji, paralajmëron se numri përfundimtar i viktimave mund të kalojë 25 mijë.
Autoritetet iraniane kanë deklaruar se mbi 3,100 persona kanë humbur jetën, duke theksuar se shumica ishin pjesëtarë të forcave të sigurisë ose civilë të goditur nga, siç i quajnë ata, “trazuesit”.
Videot më të fundit mendohet se janë xhiruar më 8 dhe 9 janar, kur mijëra qytetarë dolën në rrugë pas thirrjes për protesta mbarëkombëtare nga Reza Pahlavi, djali i ish-shahut të Iranit. Këto data konsiderohen si netët më vdekjeprurëse për protestuesit deri tani.
Pamjet e verifikuara nga BBC Verify dhe BBC Persian tregojnë të paktën 31 trupa brenda morgut të spitalit Tehranpars në lindje të Teheranit, si dhe disa qese mortore të vendosura jashtë hyrjes së spitalit.
Në video të tjera, qindra protestues shihen në një autostradë në perëndim të Teheranit, para se të dëgjohen të shtëna dhe britma paniku. Pamje të veçanta tregojnë gjithashtu protestues që përpiqen të çaktivizojnë kamerat e sigurisë për t’iu shmangur mbikëqyrjes shtetërore.
Në qytetin Kerman, në juglindje të vendit, një video e filmuar nga lart tregon persona të armatosur me uniforma ushtarake duke qëlluar me armë zjarri, ndërsa në sfond dëgjohen thirrje protestash. Ndërkohë, në Mashhad janë regjistruar snajperë të vendosur mbi çatitë e ndërtesave.
Që nga 8 janari, Irani ka qenë pothuajse plotësisht pa internet, megjithatë disa qytetarë kanë arritur të publikojnë pamje duke përdorur lidhje satelitore si Starlink apo rrjete VPN.
Sipas BBC, priten të dalin edhe më shumë video në ditët në vijim, teksa vendi po përballet edhe me vështirësi të mëdha ekonomike gjatë bllokadës.