Raportuesja e Parlamentit Evropian për Kosovën, Viola von Cramon, teksa ka folur për mosliberalizimin e vizave për qytetarët e Kosovës, ka thënë se Bashkimi Evropian ka dështuar karshi Kosovës.
Von Cramon në kuadër të panelit “Procesi i Berlinit 2.0”, të mbajtur në Berlin, ka thënë se është frustruese që Franca e disa vende tjera ende janë skeptike për çështjen e liberalizimit të vizave për qytetarët e Kosovës.
“Është shumë frustruese që Franca dhe disa vende tjera të BE-së akoma janë skeptike dhe kanë dyshime se a duhet t’i hiqen vizat qytetarëve të Kosovës, përderisa Kosova i ka plotësuar kriteret. Unë personalisht jam e befasuar me këtë skepticizëm dhe thjesht nuk kam ndonjë shpjegim”, është shprehur von Cramon, shkruan DW.
Sipas saj, demokracia është proces ku duhet të respektohen të drejtat e njeriut dhe ku respektohet rendi dhe ligji.
“Prandaj unë mendoj se mesazhi për të rinjtë e Ballkanit, të cilëve u kërkohet të angazhohen për reforma në vendet e tyre, është që edhe vet BE të reformohet”, shtoi ajo.
Raportuesja për Kosovën në Parlamentin Evropian dhe i ngarkuari i qeverisë gjermane për Ballkanin, Michael Sarazinka, kanë thënë se vendet e Ballkanit Perëndimor duhet të ndihmohen si një paketë dhe jo ndarasi dhe se Procesi i Berlinit është një mekanizëm që do ta shtyjë përpara këtë.
Po ashtu, është thënë se dialogu ndërmjet Kosovës dhe Serbisë duhet të ecë përpara.
Për të dyja vendet “është një moment i mirë që të arrijnë marrëveshje për normalizim”, të arrihet një treg i përbashkët në Ballkan dhe të mund të kontribuojnë edhe në marrëdhëniet e mira bilaterale ndërmjet vendeve.