Në seancën e së enjtes në Kuvendin e Kosovës është miratuar Projektligji për Ratifikimin e Marrëveshjes për Lëvizjen e Lirë me Letërnjoftime në Ballkanin Perëndimor.
82 deputetë kanë votuar për këtë marrëveshje, asnjë kundër dhe asnjë abstenim.
Po ashtu, është miratuar edhe projektligji për ratifikimin e marrëveshjes për njohjen e kualifikimeve të arsimit të lartë në Ballkanin Perëndimor dhe Projektligji për ratifikimin e marrëveshjes për njohjen e kualifikimeve profesionale të mjekëve, stomatologëve dhe arkitektëve në kontekstin e marrëveshjes së tregtisë së lirë të Evropës Qendrore.
Pas hyrjes në fuqi kjo marrëveshje do të mundësojë lëvizjen pa viza të qytetarëve nga Kosova dhe Bosnjë e Hercegovina.
Më 8 shkurt, Qeveria e Kosovës kishte miratuar këtë marrëveshje.
Ndërsa, nëse marrëveshja miratohet sot në Këshillin e Ministrave të Bosnjës e Hercegovinës, e njëjta dërgohet më pas për miratim në Parlamentin boshnjak.
Kjo marrëveshje është një prej tri marrëveshjeve të arritura në Berlin më 3 nëntor 2022, në kuadër të Procesit të Berlinit.
Vitin e kaluar, gjashtë shtetet e Ballkanit Perëndimor arritën edhe marrëveshjen për njohjen e kualifikimeve të arsimit të lartë dhe atë për njohjen e kualifikimeve profesionale të mjekëve, dentistëve dhe arkitektëve.