Mijëra qytetarë kanë dalë në rrugët e Minneapolis-it, duke iu bashkuar protestave të organizuara në mbarë Shtetet e Bashkuara kundër veprimeve të autoriteteve federale për zbatimin e ligjit të imigracionit, pas vrasjes së dy qytetarëve amerikanë nga agjentë federalë.
Demonstrata të ngjashme janë mbajtur edhe në qytete të tjera të mëdha si Nju Jorku, Los Anxhelosi, Çikagoja dhe Uashingtoni, ndërsa organizatorët u kanë bërë thirrje qytetarëve të qëndrojnë në shtëpi, të mos shkojnë në punë dhe të bojkotojnë shkollat si shenjë proteste.
Vrasjet e Renee Good dhe Alex Pretti kanë nxitur reagime të ashpra dhe protesta lokale, duke shkaktuar zemërim të gjerë publik në mbarë vendin, si dhe kritika nga ligjvënës të të dyja krahëve politikë.
Më herët gjatë së premtes, Departamenti i Drejtësisë i SHBA-së njoftoi se ka hapur një hetim për të drejtat civile lidhur me vrasjen e Alex Pretti.
Infermierja 37-vjeçare ishte banorja e dytë e Minneapolis-it që u qëllua për vdekje nga zyrtarë federalë të imigracionit që nga mbërritja e tyre në këtë shtet. Rasti i parë ishte ai i Renee Good, e cila u vra më 7 janar nga një agjent i Shërbimit të Imigracionit dhe Doganave (ICE).
Gjatë protestave, demonstruesit formuan fjalën “SOS” mbi një liqen të ngrirë në jug të Minneapolis-it, ndërsa një grup tjetër marshoi nëpër rrugët e qytetit duke mbajtur një kopje të madhe të preambulës së Kushtetutës amerikane.
Ndërkohë, të enjten, zyrtari përgjegjës për çështjet kufitare, Tom Homan, sugjeroi se administrata Trump mund të reduktojë praninë e forcave federale nëse autoritetet lokale bashkëpunojnë me to.
Presidenti amerikan, Donald Trump, deklaroi të enjten në mbrëmje se prioriteti i tij është ruajtja e sigurisë në vend. Sipas autoriteteve, rreth 3,000 agjentë federalë janë dërguar në Minneapolis me urdhër të tij.
Departamenti i Sigurisë Kombëtare (DHS) ka bërë të ditur se operacionet synojnë arrestimin e personave më të rrezikshëm nga emigrantët e paligjshëm me precedentë penalë, ndërsa kritikët thonë se në këto aksione po preken edhe migrantë pa të kaluar kriminale dhe qytetarë amerikanë.