Presidenti i Shqipërisë, Bajram Begaj, ka reaguar pas ngjarjes së rëndë të ndodhur në televizionin Top Channel pak orë pas mesnate.
Nëpërmjet një mesazhi në rrjetet sociale, Begaj u ka bërë thirrje organeve ligjzbatuese që ta zbardhin sa më parë dhe me përgjegjësinë më të lartë këtë ngjarje kriminale.
Po ashtu, presidenti shqiptar i ka shprehur ngushëllime familjes së rojës së sigurimit, i cili mbeti viktimë shkak i gjuajtjeve me armë zjarri.
“Ngjarje vërtet e rëndë, ajo e orëve të para të mëngjesit, ku godina e televizionit kombëtar ‘Top Channel’ është qëlluar me armë, e ku për pasojë ka humbur jetën roja i sigurisë Pal Kola. Teksa i shpreh ngushëllimet e mia familjes së z. Kola, inkurajoj organet ligjzbatuese ta zbardhin sa më shpejt dhe me përgjegjshmërinë më të lartë këtë ngjarje kriminale”, ka shkruar Begaj në Facebook.
Televizioni shqiptar, Top Channel, është përballur me një situatë të rëndë mesnatën e së dielës, ku është qëlluar me armë zjarri në drejtim të rojës së sigurimit nga persona ende të paidentifikuar.
Roja i sigurisë, Pal Kola, ka humbur jetën, pasi u qëllua me armë rreth orës 01:00, në rrethana ende të paqarta.
Në autostradën e Kavajës, te vendi i quajtur “Përroi i Agait”, është gjetur një automjet i djegur tip “Range Rover”, i cili dyshohet se u përket autorëve. Sipas informacioneve, targat e automjetit rezultojnë të vjedhura.
Policia është në vendngjarje, ndërsa grupi hetimor po vijon punën për zbardhjen e rrethanave të rastit.