Një person ka vdekur të shtunën, pasi është qëlluar me armë zjarri në fshatin Gushtericë e Poshtme të Graçanicës.
Lidhur me rastin është arrestuar një zyrtar policor si i dyshuar.
Kështu ka bërë të ditur për RTV Dukagjinin, zëdhënësja e Policisë së Kosovës për rajonin e Prishtinës, Flora Ahmeti.
Ajo bëri të ditur se vdekjen e viktimës e ka konstatuar ekipi mjekësor në vendngjarje.
Ndërsa, Ahmeti ka shtuar se aktualisht hetuesit policorë në bashkëpunim me Inspektoratin Policor të Kosovës (IPK) kanë nisur një hetim për sqarimin e të gjitha rrethanave që lidhen me rastin.
“Sot rreth orës 15:00, kemi pranuar informatën për të shtëna me armë zjarri, në fshatin Gushtericë e Poshtme. Menjëherë pas marrjes së këtij informacioni në vendin e ngjarjes kanë dalë të gjitha njësitet e nevojshme policore, të cilat kanë hasur në një person pa shenja jete. Vdekjen e viktimës (mashkull) e ka konstatuar ekipi mjekësor në vendngjarje. Personi i dyshuar (zyrtar policor) është arrestuar ndërkohë që aktualisht hetuesit policorë në bashkëpunim me IPK-në, kanë nisur një hetim për sqarimin e të gjitha rrethanave që lidhen me rastin”, ka thënë Ahmeti.
