Presidenti i Serbisë, Aleksandër Vuçiq, ka deklaruar se Serbia nuk i ka vendosur sanksione Rusisë, por që sipas tij nëse do ta bënte një gjë të tillë atëherë siç thotë ai, do të ishte “kampion i demokracisë”.
Gjatë një interviste për TV Prva pas kthimit nga Konferenca e Sigurisë së Munihut, Vuçiq iu referua vdekjes së liderit të opozitës ruse Alexei Navalny, duke theksuar se ishte një tjetër shkëndijë në zjarrin e ndezur.
“Është tragjike kur një i ri humb jetën. Nuk jam organ hetues dhe aq i mençur si të gjithë në botë që i dinë të gjitha. Nuk do të flisja as për atë se çfarë ka ndodhur me Millosheviqin, është për analistë politikë, e jo për një president vendi”, tha Vuçiq.
Ai edhe kësaj radhe nuk e la pa e përmendur Kosovën si dhe sanksionet kundër Rusisë.
“Pavarësisht se shumë gjëra nuk janë në favorin tonë dhe Kosova nuk është njohur, Serbia nuk ka asnjë sanksion ndaj vetes. Dhe ne nuk kemi vendosur as sanksione kundër Rusisë, po ta kishim bërë do të isha kampion i demokracisë, fitues i dhjetëra çmimeve dhe me njohjen e Kosovës do të merrja edhe çmimin Nobel”, ka theksuar ai.