Të martën e dhjetë majit, presidenti i Serbisë, Aleksandar Vuçiq, ka folur rreth propozimeve të presidentit francez, Emanuel Macron, i cili më 9 maj, ka potencuar nevojën për një version të ri të Bashkimit Evropian.
Këto deklarata, presidenti francez i kishte bërë para Parlamentit Evropian në Strasburg, ndërkohë kishte propozuar që të përkrahet një lloji i ri i “komunitetit politik evropian” që do t’ua mundësonte vendeve jashtë BE-së, duke përfshirë Ukrainën dhe Britaninë, që t’i bashkohen “vlerave evropiane”.
Ndërsa Vuçiq, ka thënë se që një muaj nuk ka biseduar me presidentin e Francës. Ai, gjithashtu, ka theksuar se nuk dëshiron të ndërhyjë në punët e brendshme të Bashkimit Evropian (BE), por është interesuar që të dijë se cilat janë planet e BE-së.
“Do të doja të dëgjoja se cili është plani i tij përfundimtar që të mund të deklarohem”, ka thënë Vuçiq.
Ndërsa, më nëntë maj, i pari i Francës kishte propozuar një BE paralele për shtete që kanë vlera ta përbashkët demokratike duke thënë se “komuniteti politik evropian” do të jetë i hapur ndaj kombeve demokratike evropiane, që u përmbahen vlerave thelbësore të BE-së në fusha të tilla si bashkëpunimi politik, siguria, bashkëpunimi në energji, transport, investime në infrastrukturë apo lëvizjen e njerëzve.