Vazhdimi i seancës së sotme për konstituimin e Kuvendit të Kosovës u ndërpre sërish nga kryesuesi Avni Dehari, i cili njoftoi se ajo do të vazhdojë më 19 prill në orën 12:00.
Ai theksoi se mungesa e konsensusit mes partive politike gjatë konsultimeve ishte arsyeja për shtyrjen.
Por faktet flasin ndryshe, në sallë ishin të pranishëm 100 deputetë, ndërsa për kalimin e raportit të Komisionit për Verifikimin e Mandateve nevojiteshin vetëm 51 vota – pra shumicë e thjeshtë.
Në momentin kur Dehari vendosi të ndërpresë seancën, në sallë ishin 52 deputetë që e përkrahnin raportin – mjaftueshëm për ta kaluar atë.
Pavarësisht kësaj, raporti nuk u hodh fare në votim, ndërkohë që asnjë arsye konkrete procedurale nuk u dha për ndërprerjen e seancës.
Edhe deputetë e LDK-së dhe PDK-së janë duke shpërndarë një skenar, që sipas tyre është dashur të ndiqej sot në vazhdimin e seancës konstituive, që sërish u ndërpre.
Në letrën që duhej lexuar nga Dehari, një pikë e rendit të ditës thuhet se ishte hedhja në rivotim e raportit të Komisionit për mandate, dhe se kjo sipas tyre, dëshmon se LVV-ja po synon bllokadën e konstituimit të Kuvendit.
