Lidhja Demokratike e Kosovës “është dashuruar” në frazën “Hajnat n’burg” – frazë kjo e përdorur shumë nga Lëvizja Vetëvendosje sa ishte në opozitë.
Kështu iu drejtuar deputetëve të mazhoranës deputeti i LDK-së, Driton Selmanaj, teksa si opozitë akuzuan qeverinë Kurti për praktikën e shtirë në të gjithë sistemin publik, dhënien e tenderëve njëburimorë.
Sipas Selmanajt, Vetëvendosje ka harruar frazën “hajnat n’burg” dhe se tash “po dëshiron me shku me postulatin hajnat n’zgjedhje” , pasi sipas tij, po iu “duhen paret e tyre (hajnave) për të bërë fushatë edhe një herë”.
“Ne kemi filluar me u dashuru në postulatin ‘hajnat n’burg’, por jo hajnat n’zgjedhje. Ne po dojmë më të vërtetë që hajnat me përfundu në burg, e qysh pe shoh VV-ja po dëshiron me shku me postulatin hajnat n’zgjedhje. Sepse po u duhen paratë e tyre me bë fushatë edhe një herë. Unë mendoj që është e gabueshme, prandaj ne insistojmë themelimin e këtij komisionit Hetimor.”, ka thënë Selmanaj.
Me gjithë përpjekjet e opozitës dështoi themelimi i komisionit hetimor parlamentar për tenderët njëburimorë, për shkak të mungesës së kuorumit pasi vetëm 26 deputetë kanë marrë pjesë në votim.
Por, edhe përkundër bojkotit të pozitës, kryekuvendari Glauk Konjufca, deputeti Eman Rrahmani, Jahja Kokaj dhe dhe deputeti tjetër i VV-së, Visar Korenica, votuan pro themelimit të këtij Komisioni.