“Çerekshekulli më parë, qëndresa dhe rënia heroike e komandantit legjendar të UÇK, Adem Jashari, u kthyen në një simbol të luftës së Kosovës për liri”.
Kështu ka deklaruar ministrja shqiptare për Evropën dhe Punët e Jashtme, Olta Xhaçka, teksa ka përkujtuar rënien e heroit Adem Jashari dhe familjes së tij 25 vjet më parë.
Ajo theksoi se sot Adem Jashari dhe familja e tij kujtohen me respekt e admirimin më të thellë në këtë sakrificë sublime.
“Sot, e kujtojmë me respekt e admirimin më të thellë këtë sakrificë sublime që e ka vendosur Bacën Adem dhe familjen e tij në altarin e dëshmorëve të kombit shqiptar”, ka shkruar Xhaçka në Facebook.
Ndryshe, më 5, 6 dhe 7 mars të vitit 1998, në Prekaz të Skënderajt, në Kosovë, u sulmuan nga forcat serbe shtëpitë e familjes Jashari, duke lënë të vrarë mbi 50 anëtarë të kësaj familjeje.
Me aktin e rënies së komandantit legjendar Adem Jashari, familjes së tij dhe Jasharëve të tjerë, Kosova mundi frikën duke i hapur shtigjet e lirisë dhe të ardhmërisë.
Në Prekaz, në Lagjen e Jasharëve, është ngritur monumenti më i madh i luftës për liri, për pavarësi e demokraci, që këto ditë dhe data, e pikërisht 5, 6 e 7 mars, për çdo vit vëmendja e të gjithë kombit shqiptar kthehet nga Prekazi legjendar që shekuj e vite i dha Kosovës shumë.
Historia e familjes Jashari dhe eksponentët e saj janë vendosur në Muzeun e Epopesë së Ushtrisë Çlirimtare të Kosovës.