Deklarata e ShBA-së dhe BE-së, ku thuhet se është arritur ujdi për aminstim e personave, të cilët kanë qëndruar prapa barrikadave në veri të Kosovës, është shqetësuese për analistin, Visar Ymeri.
Ai, në “Debat Plus”, ka thënë se duhet të sqarohet se kush janë ata liderë, të cilët kanë siguruar se të dyshuarit për krime në veri nuk do të ndjeken penalisht.
“Për mua pyetja kryesore është cilët janë ata liderë, të cilët mund të sigurojnë që nuk do të ketë ndjekje penale për qytetarët e Kosovës, të cilët e kanë thyer ligjin. Kush janë ata që mund të japin amnesti kokë në vete, sepse ajo mund te jepet me ligj”, ka thënë ai.
Ymeri ka theksuar se për këtë çështje duhet të japë sqarime kryeministri i Kosovës, Albin Kurti.
Kurti, sipas tij, nuk duhet ta sulmojë gjyqësorin për shkak se kjo do të thotë ndërhyrje në drejtësi.
“Kush është ai lidership i Kosovës që e ka bërë këtë zotim, që thuhet aty. Besoj që për këtë duhet të flasë kryeministri, jo të shënjojë gjykatës, është shkelje flagrante e pozitës që e mban, gjuha e tillë mundet të kategorizohet e keqkuptohet si ndjellje që ka elemente të linçimit publik dhe nxitjes”, ka thënë ai.
Visar Ymeri, ndër të tjera, ka shtuar se të drejtën për amnisti nuk e ka as gjyqësori e aq më pak Qeveria e Kosovës.