Presidenti ukrainas, Volodymyr Zelenskyy, ka thënë se nuk ka frikë nga presidenti amerikan, Donald Trump, ndryshe nga shumë liderë perëndimorë, dhe ka mohuar raportimet se takimi i tyre i fundit në Uashington ishte i tensionuar.
Ai tha se ka marrëdhënie të mira me presidentin amerikan.
Në një intervistë për “The Guardian”, Zelenskyy shtoi se Mbretëria Charles i ka ndihmuar në forcimin e marrëdhënieve me Trump dhe e përshkroi monarkun britanik si “shumë mbështetës” të Ukrainës.
Deklaratat erdhën pas sulmeve të fuqishme ruse mbi rrjetin energjetik të vendit, që shkaktuan ndërprerje të energjisë në shumicën e rajoneve ukrainase të dielën, ndërsa inxhinierët përpiqeshin ta rivendosnin atë. Gjatë intervistës, drita u fik dy herë.
Zelenskyy mohoi raportet se Trump kishte hedhur hartat e fushës së betejës gjatë një takimi në Shtëpinë e Bardhë në tetor, ku kishte shkuar për të siguruar raketa Tomahawk për Ukrainën.
“Ai nuk hodhi asgjë. Jam i sigurt,” tha Zelenskyy. Ai e përshkroi marrëdhënien e tyre si “normale”, “biznesore” dhe “konstruktive”.
Sipas raportimeve të Financial Times, Trump kishte shtyrë Zelenskyy të pranonte kushtet maksimale të Vladimir Putin për përfundimin e luftës dhe kishte paralajmëruar se Rusia do të “shkatërronte” Ukrainën nëse nuk pranonin.
Por Zelenskyy tha se takimi kishte shkuar ndryshe. Delegacioni ukrainas kishte vendosur tre panele para Trump dhe ekipit amerikan, duke paraqitur masa të njëpasnjëshme për armët dhe sanksionet ekonomike që do të “dobësonin” Moskën dhe do të detyronin Putinin të ulej në tryezën e negociatave.
Duke folur në pallatin presidencial në Kiev, Zelenskyy tha se “Të gjithë në botë kanë frikë nga Trump. Kjo është e vërteta. Por ne nuk kemi frikë … nuk jemi armiq të Amerikës. Jemi miq. Pse të kemi frikë?”
“Trump u zgjodh nga populli i tij. Ne duhet të respektojmë zgjedhjen e popullit amerikan, ashtu siç jam zgjedhur unë nga populli im. SHBA-ja është partner strategjik për ne, për shumë vite, ndoshta edhe dekada dhe shekuj”, ka shtuar ai.
Ai theksoi se dy vendet ndajnë vlera të thella, në kontrast me Rusinë “imperialiste” dhe revizioniste.