Rusia ka intensifikuar sulmet pothuajse të pandërprera me dronë dhe raketa ndaj rajoneve ku ndodhen portet kyçe të Ukrainës, të rëndësishme për tregtinë e jashtme dhe furnizimin me karburant, në një kohë kur Moska ka paralajmëruar se synon ta “shkëpusë Ukrainën nga deti”.
Këto sulme po përshkallëzohen pavarësisht përpjekjeve diplomatike të Shtetet e Bashkuara të Amerikës për arritjen e një marrëveshjeje që do t’i jepte fund luftës. Të premten, Ukraina zhvilloi bisedime me ekipin amerikan, ndërsa përfaqësuesit e SHBA-së ishin planifikuar të takoheshin me zyrtarë rusë në Florida të shtunën.
Presidenti ukrainas Volodymyr Zelensky deklaroi në Kiev se situata në rajonin e Odesa është shumë e rëndë për shkak të sulmeve ruse ndaj infrastrukturës dhe logjistikës portuale. Sipas tij, Rusia po përpiqet sërish të kufizojë qasjen e Ukrainës në det dhe të bllokojë rajonet bregdetare të vendit.
Zelensky theksoi se synimi i Moskës është të krijojë kaos dhe të ushtrojë presion moral mbi popullsinë, duke shkaktuar mungesa të karburantit, ushqimit dhe furnizimeve mjekësore.
Ndërkohë, një sulm rus në portin Pivdennyi goditi rezervuarë karburanti, bëri të ditur zëvendëskryeministri ukrainas Oleksiy Kuleba në Telegram. Ky sulm ndodhi vetëm një ditë pasi një tjetër goditje me raketa në port kishte shkaktuar vdekjen e tetë personave dhe plagosjen e të paktën 30 të tjerëve.
Nga ana tjetër, kompania prodhuese e vajit vegjetal Allseeds, me seli në Gjenevë, njoftoi se tre tanke që ruanin vaj luledielli në Pivdennyi u përfshinë nga flakët. Si pasojë e sulmit, një punëtor humbi jetën dhe dy të tjerë u plagosën.