Presidenti i Ukrainës, Volodymyr Zelensky, ka deklaruar se negociatat që po zhvillohen aktualisht mund ta ndryshojnë në mënyrë thelbësore situatën, duke theksuar rëndësinë e ushtrimit të një presioni të unifikuar nga të gjithë partnerët ndaj Rusisë për arritjen e paqes.
Zelensky i bëri këto komente në një postim në Telegram, pas një bisede me presidenten e Komisionit Evropian, Ursula von der Leyen, raporton Ukrinform, transmeton Dukagjini.
“Pata një bisedë shumë të ngrohtë dhe të mirë me presidenten e Komisionit Evropian, Ursula von der Leyen. Jam mirënjohës për gjithë mbështetjen, ndihmën dhe angazhimin maksimal, jo vetëm këtë vit, por që nga fillimi i pushtimit të plotë të Ukrainës nga Rusia,” tha Zelensky.
Ai kujtoi se javën e kaluar Këshilli Evropian miratoi një vendim për ndarjen e 90 miliardë eurove ndihmë financiare për Ukrainën për periudhën 2026–2027.
“Ne e vlerësojmë shumë faktin që Bashkimi Evropian po e mbështet Ukrainën në këtë mënyrë, në këtë moment diplomatik që në shumë aspekte është vendimtar. Aktualisht po zhvillohen negociata që mund ta ndryshojnë rrënjësisht situatën dhe është thelbësore të sigurohet presioni i duhur ndaj Rusisë për hir të paqes – presion i përbashkët nga të gjithë partnerët,” theksoi presidenti ukrainas.
Sipas Zelenskyt, biseda u përqendrua gjithashtu në rëndësinë e mbështetjes së qëndrueshmërisë së Ukrainës dhe forcimit të pozicioneve të saj në tryezën e negociatave.
“Edhe pse e gjithë bota tashmë po mendon për Krishtlindjet, ne nuk ndalemi asnjë ditë së punuari drejt qëllimit tonë të përbashkët – arritjes së paqes dhe garantimit të sigurisë,” shtoi ai.
Më herët, sipas Ukrinform, presidenti i Këshillit Evropian, António Costa, kishte deklaruar se liderët e BE-së janë dakorduar për ofrimin e 90 miliardë eurove ndihmë financiare për Ukrainën për vitet 2026–2027.