Presidenti i Ukrainës, Volodymyr Zelensky, ka deklaruar se sulmet ajrore ruse gjatë natës kanë pasur në shënjestër sektorin energjetik, infrastrukturën civile dhe “praktikisht të gjithë infrastrukturën e jetës së përditshme” në vend.
Sipas Zelenskyt, Rusia ka përdorur më shumë se 600 dronë dhe mbi 30 raketa gjatë bombardimeve, të cilat kanë shkaktuar vdekjen e tre personave, përfshirë edhe një fëmijë katërvjeçar.
“Alarmet ajrore vazhdojnë të jenë aktive në pjesën më të madhe të Ukrainës. Ndërkohë, të gjitha shërbimet përkatëse janë angazhuar për t’u përballur me pasojat e sulmeve,” deklaroi presidenti ukrainas.
Ai theksoi se goditjet e kryera pak para Krishtlindjeve, në një kohë kur qytetarët “duan thjesht të jenë me familjet e tyre, në shtëpi dhe të sigurt”, përbëjnë “një sinjal jashtëzakonisht të qartë për prioritetet e Rusisë”.
“Putini ende nuk mund ta pranojë se duhet të ndalë vrasjet. Kjo do të thotë se bota nuk po ushtron mjaftueshëm presion ndaj Rusisë,” shtoi Zelensky.
Një nga viktimat është raportuar në rajonin qendror të Zhytomyr-it. Kreu i administratës rajonale, Vitaly Bunechko, njoftoi se një vajzë katërvjeçare ka ndërruar jetë pasi u plagos rëndë gjatë sulmeve ajrore ruse.
“Ajo u dërgua me urgjencë në spital. Mjekët luftuan për jetën e saj, por fatkeqësisht nuk arritën ta shpëtojnë,” tha Bunechko, duke shtuar se pesë persona të tjerë janë plagosur nga sulmet./BBC