Presidenti i Ukrainës, Volodymyr Zelensky, ka shkarkuar dy ministra të qeverisë së tij, të akuzuar për përfshirje në korrupsion në sektorin e energjisë, ndërsa zemërimi i publikut po rritet.
Ministrja e Energjisë, Svitlana Grynchuk, dhe ministri i Drejtësisë, Herman Halushchenko, dorëzuan dorëheqjet e tyre të mërkurën, duke mohuar çdo shkelje.
Zelensky gjithashtu kërkoi sanksione personale ndaj mikut dhe ish-partnerit të tij të biznesit, Timur Mindich, i cili dyshohet si organizatori i skemës.
“Duhet të ketë integritet maksimal në sektorin e energjisë, në të gjitha proceset,” tha Zelensky.
“Mbështes çdo hetim të autoriteteve ligjzbatuese dhe anti-korrupsion. Është e patolerueshme që, ndërkohë që vendi po përballet me sulme ruse dhe ndërprerje energjie, të ekzistojnë edhe skema korrupsioni”.
Hetimi nga Zyra Kombëtare Anti-Korrupsion (NABU) ka zgjatur 15 muaj dhe përfshin kompaninë shtetërore bërthamore Energoatom.
Skema, sipas NABU-së, detyronte kompanitë kontraktore të paguanin ryshfet 10-15% për të mos u bllokuar pagesat ose për të ruajtur statusin e furnizuesit.
Mindich, themelues i kompanisë së mediave Kvartal 95, ku Zelensky ka qenë bashkëthemelues, dyshohet se ka ikur jashtë vendit para se të kryhej bastisja në apartamentin e tij në Kiev.
Ai është një nga shtatë personat e dyshuar për përfshirje në skemën korruptive prej 100 milionë dollarësh.
Audio-përgjime të publikuara nga NABU tregojnë diskutime për ryshfete dhe përdorimin e pseudonimeve; Halushchenko ishte i koduar “Profesor”, ndërsa Mindich “Karlson”. Një tjetër person i profilit të lartë, Oleksiy Chernyshov, ish-zëvendëskryeministër, dyshohet për përfitime të paligjshme prej gjysmë milioni dollarësh.
Ky skandal vjen pas një ligji të kontestuar të miratuar nga Zelensky në korrik, i cili dobësonte fuqitë e NABU-së dhe prokurorisë së specializuar anti-korrupsion, duke shkaktuar protesta masive. Pas presionit publik, ligji u ndryshua për të rikthyer pavarësinë e këtyre institucioneve.
Hetimi i Energoatom vijon, ndërsa çështjet e tjera të dyshuara për përfitime të paligjshme dhe ndikim politik mbeten nën shqyrtim./TheGuardian