Deputeti i Lidhjes Demokratike të Kosovës (LDK), Armend Zemaj, në emisionin “Reload” në RTV Dukagjini, ka treguar se para se të fillonte të merrej me politikë, kishte punuar në komisionin për legjislacion dhe kishte përfunduar provimin e jurisprudencës.
“Kisha dëshirë shumë që të kthehesha në profesion si jurist, përfundova provimin, mendoja se si të qasem, ishte një lloj dëshire të jem pjesë e institucioneve gjyqësore, prokurorial ose në avokati”, ka thënë Zemaj.
Por, sipas Zemajt, politika është një lloj “obligimi”.
“Por politika është një lloj obligimi, sepse ti e merr një mandat, e ke një mandat dhe e përfundon, mendon që e përfundon dinjitetshëm dhe nuk je ai që e lë partinë, ndoshta në momente që ka nevojë për ty”, ka thënë ai.
Zemaj është shprehur se kur je i angazhuar në politikë nuk lejohet të bësh punë tjetër ose të zhvillohesh në sfera të tjera si ato biznesore ose të tjera.