Deputeti i LDK-së, Armend Zemaj, ka thënë se ministrat e Qeverisë së Kosovës po heshtin pas djegies së dy zyrave të IML-së në Prishtinë.
“Zjarri ka kapluar QKUK-në kurse heshtja ministrat e paaftë të Qeverisë së mashtrimit. Para pak kohësh zjarri përfshiu Shërbimin Emergjent në Klinikën e Psikiatrisë të QKUK-së, ku pati edhe një viktimë e brenda pak kohëve, tash e disa herë digjet Instituti i Mjekësisë Ligjore”, tha ai.
Zemaj bëri thirrje për përgjegjësi dhe po ashtu dorëheqje.
Objektin e Institutit të Mjekësisë Ligjore e ka kapluar zjarri mëngjesin e së martës.
Zëdhënësja e Policisë së Kosovës për rajonin e Prishtinës, Flora Ahmeti, ka thënë se dy zyra janë përfshirë nga zjarri dhe se nuk raportohet për të lënduar.
Ministria e Drejtësisë ka reaguar në lidhje me zjarrin në objektin e Institutit të Mjekësisë Ligjore (IML).
Në reagimin e tyre thuhet se zjarri është lokalizuar dhe se ende nuk dihen shkaqet.