Deputeti i Lidhjes Demokratike të Kosovës (LDK), Armend Zemaj, ka thënë se për t’i besuar kryeministrit të Kosovës, Albin Kurti, se a është draft-statuti për Asociacionin brenda kornizave kushtetuese, duhet parë dokumentin.
Zemaj, në emisionin “FIVE”, ka thënë se nuk mund të dihet se a është brenda apo jashtë kornizave ende pa u parë dokumenti.
“Ne për t’i besuar Kurtit duhet të kishim parë dokumentin, edhe nëse është brenda kornizave apo jashtë kornizave kushtetuese, ne duhet ta shohim”, ka thënë Zemaj.
Ai ka thënë se Kurti duhet të tregojë se çfarë do të nënshkruajë dhe të tregojë më shumë për substancën e këtij dokumenti.
Ndryshe, sot në seancën e së premtes në Kuvendin e Kosovës, kryeministri i Kosovës, Albin Kurti, ka thënë se nëse në Bruksel do t’i ofrohej vetëm nënshkrimi i draftstatutit për Asociacionin, nuk do ta pranonte.
Kurti ka theksuar se e ka pranuar draftin e Asociacionin si pjesë të një pakete, ku përfshihet edhe Marrëveshja Bazë e Aneksi i Zbatimit.