Sot, Komandanti i misionit të KFOR-it, gjeneralmajori Ozkan Ulutash, priti në takim Shefin e Misionit të Vëzhgimit të Zgjedhjeve të Asamblesë Parlamentare të Këshillit të Evropës (PACE), Yunus Emre.
Siç njofton KFOR-i, takimi shërbeu si një mundësi e vlefshme për shkëmbimin e pikëpamjeve lidhur me situatën e sigurisë në Kosovë, si dhe për të theksuar përkushtimin e KFOR-it në ruajtjen e një mjedisi të sigurt dhe të qetë për të gjithë qytetarët që jetojnë në Kosovë, njofton Dukagjini.
Kujtojmë se ditë më parë u bë e ditur se një delegacion prej 6 anëtarësh i Asamblesë Parlamentare të Këshillit të Evropës (PACE), i kryesuar nga Yunus Emre nga Turqia, do të udhëtojë në Kosovë nga 27 deri më 29 dhjetor për të vëzhguar zgjedhjet e parakohshme parlamentare.