Frekuentimi i Fakulteteve të Universitetit të Prishtinës, nga ana e studentëve ka qenë gjithmonë i madh, shkaku i ligjeratave dhe provimeve të cilat mbahen në to.
Mirëpo, këtë radhë frekuentimi i hapësirave të fakulteteve po ndodh për një arsye tjetër.
Është fushata zgjedhore e Organizatave studentore, që më datën 10 qershor do t’i nënshtrohen procesit zgjedhor për të përfaqësuar studentët në senatin e UP-së.
Sikurse para dy vjetësh, ky proces do të zhvillohet online përsëri edhe këtë vit.
Kështu e ka konfirmuar Florent Mucaj, kryesues i Komisionit zgjedhor për zgjedhjet studentore.
“Në bazë të konsultimit Këshilli Drejtues i UP-së, ka vendosur që zgjedhjet studentore t’i mbajë online, duke pasur parasysh edhe përvojën e dy viteve të mëhershme”, ka thënë Florent Muçaj, kryesues i Komisionit zgjedhor për zgjedhjet studentore.
E këtë formë të votimit e ka kundërshtuar organizata studentore, Studim Kritikë Veprim.
“Këshilli Drejtues i UP-së, ka shkelur rregulloren e Universitetit të Prishtinës, të cilën e ka miratuar pak ditë para shpalljes së zgjedhjeve studentore”, ka thënë Edi Zenelaj nga Organizata SKV.
Ndërsa, nga organizata studentore Reforma, nuk shihet problem kjo formë e votimit.
Ndër tjerash, për Bleron Bekën që kandidon për kryetar të Parlamentit Studentor, problem kryesor mbetet infrastruktura brenda universitetit.
“Infrastruktura në Universitetin e Prishtinës nuk është shumë e mirë, garantojmë që do të shtyjmë përpara secilen temë që mundëson digjitalizimin në bibliotekat dhe katalogjet e secilit fakultet, digjitalizimin e Bibliotekës Kombëtare, digjitalizimin e procesit mësimor”, është shprehur Bleron Beka nga Organizata Reforma.
Ndërkohë, studentët këto zgjedhje i shohin shumë të rëndësishme për të shtyrë përpara kërkesat e tyre.
“Nëse përfaqsohen studentët nga njërëzit e duhur, atëherë do të arrihet jo vetëm të ndikojë në të drejtat e studentëve por edhe në aspektin e avancimit profesional të tyre”, ka deklaruar Rilind Kuqi, student.
Mbajtjen e zgjedhjeve studentore brenda Universitetit e organizon dhe mban Komisioni Qendror Zgjedhor që themelohet nga Këshilli Drejtues i UP-së.