Një numër i madh zyrtarësh të administratës së ish-presidentit Donald Trump, përfshirë Steven Miller – arkitektin e reagimit qeveritar ndaj vrasjes së aktivistit konservator Charlie Kirk – janë zhvendosur në banesa ushtarake në zonën e Uashingtonit për shkak të shqetësimeve për sigurinë personale.
Sipas gazetës The Atlantic, Miller, i njohur për retorikën e tij nxitëse dhe rolin në ndalimin e organizatave liberale në SHBA, është një ndër të paktën gjashtë zyrtarë të lartë që aktualisht jetojnë në enklava të mbrojtura ushtarake. Ky zhvillim, sipas analizës, reflekton një “shenjë ogurzezë” të polarizimit të thellë politik në Shtetet e Bashkuara.
Ndër të zhvendosurit përfshihet edhe Sekretarja e Sigurisë Kombëtare, Christie Noem, e cila pas publikimit të adresës së saj nga mediat, u transferua në një rezidencë të Rojës Bregdetare në Bazën e Përbashkët Anacostia-Bolling. Edhe Sekretari i Shtetit, Marco Rubio, dhe Sekretari i Mbrojtjes, Pete Hegseth, jetojnë tashmë në Fort McNair, ndërsa Sekretari i Ushtrisë, Dan Driscoll, ndan një banesë në Mayer-Henderson Hall pranë Varrezave të Arlingtonit.
Kjo nuk është hera e parë që anëtarët e kabinetit amerikan strehohen në baza ushtarake, por The Atlantic vëren se asnjëherë më parë numri nuk ka qenë kaq i lartë. Sipas analistëve, vendimi pasqyron rritjen e rrezikut ndaj zyrtarëve amerikanë, pas tentativave të atentateve ndaj Trumpit, kërcënimeve iraniane dhe një serie ngjarjesh të dhunshme politike në vend.
Izolimi i zyrtarëve në mjedise ushtarake, sipas revistës, po thellon hendekun mes administratës dhe qytetarëve, duke i ndarë këshilltarët e Trump nga realiteti i përditshëm i kryeqytetit. Gjithashtu, kjo qasje zbeh kufirin tradicional midis sferës politike dhe asaj ushtarake, pasi Trump ka përfshirë gjithnjë e më shumë ushtrinë në politikat e brendshme.
Në qendër të vëmendjes është edhe Stephen Miller, zëvendësshefi i stafit të Shtëpisë së Bardhë dhe hartuesi i politikës së ashpër të deportimit të emigrantëve. Ai është përballur me protesta pas komenteve të tij të ashpra kundër demokratëve dhe lëvizjeve liberale. Pas një fushate aktivistësh që shënjestruan shtëpinë e tij, familja Miller vendosi ta shesë banesën e tyre në Uashington për 3.75 milionë dollarë.
Në një reagim në rrjetet sociale, bashkëshortja e tij, Katie Miller, deklaroi se “nuk do të tërhiqen e as do të frikësohen”, duke e lidhur qëndrimin e tyre me “kujtesën për Charlien”.
Sipas The Atlantic, zhvendosja e zyrtarëve në baza ushtarake po simbolizon realitetin e ri të ndarjes shoqërore dhe politike në Amerikë – një vend gjithnjë e më i polarizuar mes sigurisë dhe frikës.