Pesëmbëdhjetë vende evropiane kanë njoftuar të enjten e 13 tetorit se janë bërë së bashku për të blerë sistemet e mbrojtjes ajrore për të mbrojtur kontinentin nën një Iniciativë të sapokrijuar Evropiane të Mburojës së Qiellit.
Gjermania, e cila udhëhoqi projektin, do të koordinojë prokurimet e përbashkëta për të mbrojtur kundër raketave me rreze të afërta, si dhe me rreze të mesme dhe të gjata, ka thënë ministria e saj e mbrojtjes.
“Ka të bëjë me aftësinë për të vendosur çmimet në përputhje me rrethanat dhe, natyrisht, ka të bëjë gjithashtu me të qenit në gjendje të mbështesim njëri-tjetrin bashkërisht për sa i përket mirëmbajtjes. Pra, është një situatë e favorshme për vendet që janë pjesë e saj”, ka thënë ministrja Christine Lambrecht të enjten në mëngjes.
Katërmbëdhjetë nga vendet e përfshira Belgjika, Bullgaria, Çekia, Estonia, Gjermania, Hungaria, Letonia, Lituania, Hollanda, Norvegjia, Sllovakia, Sllovenia, Rumania dhe Mbretëria e Bashkuar janë anëtarë të NATO-s. Ndërkaq Finlanda, aplikimi i së cilës për aleancën ushtarake transatlantike është në pritje, po merr gjithashtu pjesë.
“Ne jemi të hapur për të gjithë dhe e dimë nga shumë vende se ka ende një interes të madh dhe kemi bërë punë përgatitore duke filluar negociatat paraprakisht në shtetet nënshkruese,” ka shtuar Lambrecht, raporton euronews.
Nisma është përkrahur për javë të tëra nga kancelari gjerman Olaf Scholz, i cili e ka quajtur atë një “fitim sigurie për të gjithë Evropën” në një fjalim në Pragë në gusht dhe ka argumentuar se do të ishte më ekonomike dhe më efikase sesa sistemet kombëtare.