Ish-kryeministri i Britanisë së Madhe gjatë kohës së luftës në Kosovë, Tony Blair, këtë të hënë do t’u drejtohet me një fjalim deputetëve të Kuvendit të Kosovës.
Kjo seancë solemne për 25-vjetorin e çlirimit, pritet të fillojë nga ora 10:00.
Para seancës, presidentja e Kosovës, Vjosa Osmani do ta presë në takim Tony Blair, ish-kryeministër i Mbretërisë së Bashkuar.
Pas përfundimit të takimit, Osmani dhe Blair do të deklarohen për media.
Edhe kryeministri i Kosovës, Albin Kurti, pritet ta takojë ish-kryeministrin britanik, Tony Blair.
Gjatë kohës së bombardimeve të NATO-s, më 1999, Blair ka qenë kryeministër i Britanisë së Madhe.
Ai, bashkë me ish-presidentin amerikan, Bill Clinton, konsiderohen si mbështetësit më të mëdhenj të Kosovës në atë kohë.
Në shenjë admirimi për kontributin që ka dhënë, në Kosovë u është vënë emri i tij disa fëmijëve të lindur pas luftës, e të cilët tash janë në moshën 25-vjeçare.