Është derguar në paraburgim për 30 ditë, 16 vjeçari nga Peja, i cili dyshohet se ishte duke planifikuar vrasjen e nxënësve të klasës.
Personi i njëjtë po dyshohet për planifikim të veprave terroriste dhe vepra penale kundër rendit kushtetues.
Lajmin për caktimin e masës se paraburgimit për Portalin Dukagjini e ka konfirmuar zëdhënësja e Gjykatës së Prishtinës, Mirlinda Gashi.
“Gjykata Themelore në Prishtinë, Departamenti për të Mitur ka vendosur lidhur me kërkesën e Prokurorisë Speciale të Republikës së Kosovës, për caktimin e masës së paraburgimit ndaj të miturit B.M, për shkak të dyshimit të bazuar se ka kryer veprën penale Përgatitja e veprave terroriste ose veprave penale kundër rendit kushtetues dhe sigurisë së Republikës së Kosovës”, ka thënë Gashi.
Gashi ka thënë se gjyqtarja e procedurës paraprake ka aprovuar si të bazuar kërkesën e Prokurorisë Speciale të Republikës së Kosovës, për caktimin e masës së paraburgimit ndaj të miturit B.M dhe të njëjtit i ka caktuar masën e paraburgimit në kohëzgjatje prej 30 ditësh.
Ajo ka thënë tutje se kundër këtij aktvendimi, palët e pakënaqura kanë të drejtë ankese në Gjykatën e Apelit, përmes Gjykatës Themelore në Prishtinë.