Tentim për t’ua mbyllur gojën mësimdhënësve, e ka quajtur vendimin e Qeverisë së Kosovës për ndaljen e pagës, analisti Dardan Gashi.
Ai ka thënë se veprimet e Qeverisë janë mesazhe për të tjerët që të mos provojnë të hyjnë në grevë.
Gashi ka thënë se greva është e drejtë demokratike e mësimdhënësve, të cilën sipas tij, qeveria po tenton ta shtypë përmes ndaljes së pagës.
“E drejta e grevës, sepse pjesa a duhet të paguhen apo jo është diçka tjetër. Mirëpo me anë të kësaj pyetje, po tenohet ndalja e njerëzve të bëjnë grevë. Po duan të hakmerren ndaj mësuesve që e kanë përdorur të drejtën e tyre për të protestuar”, ka thënë ai.
“Është e drejtë demokratike ta shfaqin protestën e tyre, dhe kur qet në këtë nivel se a ia lejon ligji apo jo të paguhen. Debati duhet të kthehet diku tjetër, po e shoh tendencën e qeverisë t’ia mbyllë gojën”, ka vijuar ai.
Gashi është shprehur se tendenca e Qeverisë Kurti është që t’i nënshtrojë sindikatat dhe t’i shndërrojë ato në përkrahëse të partisë së tyre.