Ministri i Kulturës, Rinisë dhe Sportit, Hajrulla Çeku, përmes një postimi në Facebook, ka përgëzuar Baletin Kombëtar të Kosovës për organizimin me rastin e 50-vjetorit të këtij institucioni dhe ka thënë që i kanë borxh një objekt ku mund të performojnë dinjitetshëm balerinët kosovarë.
Çeku ka thënë që në këtë mbrëmje u festua gjysmë shekulli i Baletit Kombëtar të Kosovës me sjelljen në skenë të baletit të parë shqiptar “Halili dhe Hajria”.
“Balerinët e Baletit Kombëtar të Kosovës së bashku me balerinë nga Teatri i Operës dhe Baletit në Shqipëri, nën përcjelljen e Orkestrës së Filharmonisë së Kosovës, na dhuruan emocione të fuqishme krenarie dhe na shpërfaqën shembullin se si ngritet një institucion me pasion, këmbëngulje e denjësi”, ka shkruar Çeku.
Ndër të tjera, ai ka thënë se i kanë borxh këtij institucioni një objekt, sepse edhe pas 50 viteve të themelimit të tij ende nuk e kanë një vend adekuat për të performuar.
“Mbi të gjitha, edhe sonte u vërtetua që ende i kemi një borxh të madh balerinëve, koreografëve, kostumografëve e skenografëve që kanë punuar gjatë këtyre viteve për të mirë të baletit kosovar, e ajo është ndërtimi i një objekti ku Baleti Kombëtar i Kosovës sjell në skenë shfaqjet e tyre në mënyrë të dinjitetshme”, ka vijuar ai.
Ministri Çeku ka shkruar se performanca e balërinëve dhe balerinave u kishte dhënë emocion të veçantë dhe se organizimi i kësaj ngjarjeje ishte ashtu siç i ka hije festimit të 50-vjetorit të themelimit të Baletit Kombëtar të Kosovës.