Kryeministri i Kosovës, Albin Kurti, në kuadër të vizitës në komunën e Gjilanit ka mbajtur edhe një takim me të parin e kësaj komune, Alban Hyseni.
I pasi i Qeverisë kosovare ka theksuar disa nga të arriturat e kësaj komune në 10 muajt e fundit gjatë qeverisjes së Alban Hysenit.
“…Prezantimi ishte i gjatë për shkak se edhe të arriturat dhe punët janë të shumta, prej palestrës në Zhegër të cilët kanë ngelur vetëm kulmi t’i vendoset, pastaj te shtimi i bursave për 150%, prej 60 mijë në 150 mijë euro për bursat për studentë, te rritja e buxhetit të sportit për 50% e deri te zvogëlimi i jashtëzakonshëm i borxhit që është gjetur këtu në komunë kur ka filluar qeverisja jonë. Gjithsej, është gjetur një borxh prej 26 milionë eurosh, ndërkaq për vetëm 10 muaj janë zvogëluar 5 milionë euro borxh e ky është një borxh i akumuluar për më shumë sesa 1 dekadë, dhe kjo paralelisht me 6 milionë euro investime nga komuna”, ka thënë Kurti.
Kurti u zotua se se në komunën e Gjilanit do të ketë vëmendje më të shtuar se në të kaluarën.
“Zotohem se Gjilani do të ketë vëmendje të shtuar krahasuar me të kaluarën për shkak se është lënë për një kohë shumë të gjatë anash, kërkesat dhe nevojat janë shumë të mëdha, dhe gjithashtu kemi një qeverisje të mirë e cila të mbushë me optimizëm se nuk do të ketë keqpërdorim”, tha Kurti
Ai gjithashtu kërkoi nga qytetarët e Gjilanit që ta kursejnë sa të munden energjinë elektrike, dhe sipas tij kushdo që kursen do të shpërblehet.
“Kushdo që kursen në faturën e muajve në vijim në raport me muajt e njëjtët të vitit të kaluar, e dyfishojmë shpërblimin për nga vlera e krahasuar me kursimin, por gjithashtu dëshirojmë që në pranverë të dalim sa më kollaj sa u përket dëmeve dhe humbjeve që mund të kemi për shkak të domosdoshmërisë së importit të energjisë elektrike, në kushtet kur gjenerimi aktual me kapacitetet që kemi nuk arrin ta mbulojë pikun e konsumit”, ka shtuar Kurti.