Për herë të parë në historinë e shtetit të Kosovës, nënkryetarja e Kuvendit të Kosovës, Saranda Bogujevci, i është drejtuar Asamblesë Parlamentare të Këshillit të Evropës, ku foli për demokracinë në Kosovë e rajon, si dhe për luftën në Ukrainë.
Bogujevci e ripërsëriti qëndrimin e shtetit të Kosovës në përkrahje të Ukrainës e cila po përballet nga pushtimi i Rusisë.
Ajo tha se bashkëndien me popullin ukrainas, duke theksuar se vetë është e mbijetuar e një masakre në luftën e fundit në Kosovë.
“Kjo është hera e parë që po i adresohem një paneli të tillë, dua t’u them qytetarëve të Ukrainës që janë në zemrat dhe në mendimet tona përherë, e dimë shumë mirë se në çfarë jeni duke kaluar, edhe unë jam e mbijetuar e një masakre. Gjithmonë do të qëndrojmë me ju dhe shpresojmë që që kjo luftë të mbarojë së shpejti”, ka thënë ajo.
Bogujevci, tha se Kosova e ka demokracinë më të avancuar në rajon, teksa i ftoi anëtarët e asamblesë që të vijnë ta vizitojnë Kosovën dhe ta shohin për së afërmi avancimin e saj demokratik.
“Sot mund të flas për shumë gjëra, për arritjet e Kosovës, një nga demokracitë më të avancuara në rajon, nëse nuk më besoni, mundeni të vini të na vizitoni dhe ta shihni vetë”, u shpreh ajo.
Përveç anëve pozitive, Bogujevci foli edhe për sfidat e shtetit të Kosovës, duke e vënë theksin në problemet me shtetin e Serbisë dhe ndikimin e luftës së fundit, e cila ka shumë ndikim te populli i Kosovës.
“Vështirësitë me të cilat po përballemi, vështirësitë me fqinjin tonë, apo edhe për të kaluarën që kemi pasur. Por, sot jemi duke u përballur me shqetësime më të mëdha se vetë rajoni ynë, sot po ballafaqohemi me luftën brutale, sot po luftojmë për demokraci”, ka thënë ajo.
Nënkryetarja e Kuvendit të Kosovës po ashtu shtoi se të gjitha vendet e rajonit dhe jo vetëm Kosova duhet të jenë të guximshme dhe të marrin vendime që do të kenë impakt pozitiv, jo vetëm në rajon, por në të gjithë Evropën.