Çështja e kornizës së marrëveshjes dhe zbatimi i marrëveshjes së energjisë ishin dy temat në të cilat fokusohej takimi i së enjtes në mes Kryeminsitrit Kurti dhe Përfaqësuesit të posaçëm të Bashkimit Evropian për dialogun Kosovë-Serbi, Miroslav Lajçak.
Në një përgjigje për RTV Dukagjini, Kryeministri Kurti ka thënë se bazuar në ngjarjet akutale, fokusi i disuktimeve në mes Kurtit dhe Lajçak ishte zbatimi i marrëveshjes për energjinë, ashtu që në Veri të Ibrit të paguhet energjia elektrike.
“Gjithmonë i kemi dy tema të diskutimit. E para korniza e përgjithshme e marrëveshjes dhe e dyta është zbatimi i marrëveshjes së energjisë në mënyrë që edhe në veri të Ibrit të fillojë inkasimi i energjisë. Te çështjet aktuale, fokusi ynë është zbatimi i marrëveshjes për energjinë që edhe atje të paguhet rryma”, ka thënë Kurti.
Krahas kësaj, ai ka thënë se “çka ne kemi diskutuar është progresi i Kosovës në raportin e Progresit”.
Lajçak: Duhet të ketë progres në dialog Kosovë-Serbi para zgjedhjeve në BE dhe ShBA
Përfaqësuesi i posaçëm i Bashkimit Evropian për dialogun Kosovë-Serbi, Miroslav Lajçak, pas takimit me kryeministrin e Kosovës, Albin Kurti dhe me zëvendëskryeministrin, Besnik Bislimi ka thënë se ky takim ka qenë një takim i rregullt.
Lidhur me takimin, Lajçak kishte thënë se është diskutuar për dialogun dhe se është mirë që të ketë progres dhe normalizim në dialogun Kosovë-Serbi para zgjedhjeve në Bashkim Evropian dhe në Shtetet e Bashkuara të Amerikës, sepse vëmendja prej dialogut do të zhvendoset.