Shefi i Grupit Parlamentar të Aleancës për Ardhmërinë e Kosovës (AAK), Besnik Tahiri, ka thënë se kryetari i Kuvendit të Kosovës, Glauk Konfjuca, duhet të adresojë çështjen e liberalizimit të vizave në BE.
Tahiri, mosliberalizimin e vizave për qytetarët e Kosovës nga Bashkimi Evropian, e ka quajtur diskriminim klasik.
“Në kryesi e kam ngritur një kërkesë që Kuvendi përmes kryetarit t’i adresohet presidencës çeke dhe kryeparlamentarëve të vendeve anëtare, me një kërkesë të thjeshtë që lidhet me një mosvendim për liberalizimin e vizave, e që për neve është diskriminim klasik”.
Sipas tij, heshtja e Kuvendit përballë kësaj çështjeje nuk është e pranueshme.
Ai ka thënë se në seancën e fundit, janë ratifikuar nëntë marrëveshje ndërkombëtare, ku shumë prej tyre janë të lidhura ngushtë me BE-në, prandaj ai është shprehur se “heshtja jonë nuk i bën hair e as nder Republikës së Kosovës”.
Ndërsa për Ligjin e Pagave, Tahiri ka thënë se ky ligj ka përfunduar fazën e konsultimit publik, por që nuk po shkon në Kuvend për miratim.
Në anën tjetër, shefi i GP të Partisë Demokratike të Kosovës (PDK), Abelard Tahiri, pas vendimit të Kryesisë së Kuvendit për mbajtjen e seancës më 20 tetor, ka deklaruar se shqyrtimi i parë i projektligjit për mbështetjen e punëve publike është me rëndësi, pasi sipas tij, e trajton çështjen e inflacionit, kontratat e lidhura për rrugë, shkolla e çerdhe, të cilat sipas tij, nuk po realizohen për shkak të ngritjes së çmimeve.
Sipas tij, Kosova ka një ngecje dhe mungesë të realizimit të projekteve.
Ai për këtë ka fajësuar Qeverinë e Kosovës, duke thënë se ka mosefikasitet të punës.
“Sikur të kishte qeveri më efikase atëherë do të realizoheshin projektet e parapara”, ka thënë ai.
Sipas tij, për vitin 2022, është projekt-buxheti që e ka miratuar vetë kjo Qeveri, e cila ende nuk e ka shpenzuar buxhetin për këto programe të parapara.