Ambasadori i Gjermanisë në Kosovë, Jorn Rohde, në tryezën “Agjenda Evropiane 2022” të Komisionit për Integrim Evropian, ka thënë se duhet të ketë një zgjidhje të shpejtë në lidhje me liberalizimin e vizave për Kosovën.
Rohde, po ashtu, tha se e ardhmja e Kosovës është në Bashkimin Evropian.
“Agresioni rus kundër Ukrainës na ka bërë të ditur se sa i rëndësishëm është zgjerimi i BE-së dhe kjo vlen edhe për liberalizimin e vizave, dhe ne të gjithë pajtohemi se e ardhmja e Kosovës është BE-ja. Dhe kjo do shumë punë”, tha ai.
Ndërsa, ambasadori i Republikës Çeke, Pavel Bílek, ka deklaruar se shteti që ai përfaqëson është i fokusuar t’i ndihmojë vendet e Ballkanit Perëndimor, sidomos në fushën e energjisë.
“Kjo periudhë e vështirë na sjell shumë sfida, por na bën me dije se duhet të ndihmojmë Ballkanin Perëndimor. Presidenca e Çekisë është duke u fokusuar që të ndihmojë Ballkanin Perëndimor që të përfitojë si në fushën e energjisë, agjendën e gjelbër e të tjera”, ka thënë ai.
Po ashtu, ai ka kërkuar që vendet e Ballkanit Perëndimor të përfshihen në fusha të rëndësishme, siç është ajo e sigurisë kibernetike.