Deputeti i Lëvizjes Vetëvendosje, Haki Abazi, ka thënë se nuk ekziston asnjë propozim gjerman për Asociacionin.
Në një konferencë për media, Abazi ka thënë se propozimi i vetëm për Asociacionin e komunave është ai i cili duhet formuar në ligjet ekzistuese të Kosovës.
“Nuk ka propozim gjerman, nuk mund të ketë asnjë propozim me emra të tjerë. Në fakt ka vetëm një propozim është Asociacioni i komunave i cili duhet të formohet bazuar në ligjet ekzistuese të vendit. Nuk ka Asociacion që mund t’i kalojë ligjet dhe kushtetutën e vendit. Nuk mundet një shtet që ka bërë gjenocid në të kaluarën të vendosë kushte për qytetarët e Kosovës”, ka deklaruar Abazi, gjersa ka thënë se do të duket qesharake që një shtet që ka vrarë fëmijë e gra tenton të jetë garantues demokratik i të drejtave të serbëve në Kosovë.
Krahas kësaj, ai ka thënë se procesi i reformave zgjedhore duhet përcjellë me kujdes dhe se i njëjti duhet të digjitalizohet.
“Po ju thërras të gjithëve, ekspertë, juristë e shoqërinë civile dhe mediat që të përcillni me kujdes këtë proces të rëndësishëm të reformës zgjedhore. Duhet të bëhet zgjedhja e drejtpërdrejtë e presidentit me votën e qytetarëve”, ka deklaruar Abazi.