Ish-deputeti i AAK-së, Daut Haradinaj, e ka kritikuar presidenten e Kosovës, Vjosa Osmani, duke e quajtur atë, “vuvuzelë të qeverisë”.
Haradinaj në Debat Plus, ka thënë se presidentja Osmani nuk ka qasje serioze ndaj çështjeve serioze siç është dialogu Kosovë-Serbi derisa ka shtuar se deklaratat e saj kanë për qëllim “lajthitjen e opininonit publik”.
“Presidentja është bërë si vuvuzelë e Qeverisë, ajo nuk mund të merret seriozisht çfarë po thotë. Ajo një ditë thotë fake news, një ditë thotë shumë shpejt do ta publikojmë, drafti është i mirë, jemi duke e shqyrtu. Ajo po mundohet ta lajthisë opininon publik, cilës ti besojmë asaj para një javë apo sot”, ka thënë Haradinaj.
Haradinaj, foli edhe për marrëveshjet e Asociacionit të Komunave me Shumicë Serbe, për të cilën tha se është marrëveshje ndërkombëtare dhe se secila qeveri që vjen e ka për obligim ta zbatojë.
“Kur ke një marrëveshje ndërkombëtare secila qeveri obligohet. Problemi është çfarë statusi duhet të ketë ai. Kanë dalë disa dokumente nuk e di a janë valide, por shihet që janë duke punuar akterë seriozë në të”, ka deklaruar ai.
Haradinaj, ripërsëriti qëndrimin e AAK-së, se çdo propozim që vjen nga ShBA-ja, duhet të merret seriozisht nga Qeveria e Kosovës.