Ministri i Mbrojtjes, Armend Mehaj, ka njoftuar se është duke vazhduar avancimi i shkathtësive profesionale të specialistëve të kërkim-shpëtimit malor në Qendrën e Alpinizmit Ushtarak në Itali.
“Në kuadër të bashkëpunimit bilateral në fushën e mbrojtjes me Italinë, specialistët tanë nga Togu i Kërkim-Shpëtimit Malor të Gardës Kombëtare të FSK-së, kanë kryer me sukses trajnimin e kërkim-shpëtimit malor në qendrën e alpinizmit ushtarak në Centro Addestramento Alpino në Aosta të Italisë”, ka shkruar Armend Mehaj.
Ministri Mehaj ka njoftuar se gjatë trajnimit, specialistët kanë avancuar shkathtësitë e tyre për qasje tek viktimat në faqe shkëmbore, dhënie të ndihmës së parë, evakuim të viktimave, lëvizje në akullnaja, qasjen në viktimat brenda qarjeve të thella dhe tërheqjen e tyre në vend të sigurtë, kërkim në pyje dhe zona malore, si dhe kërkim në ortek duke përdorur pajisje dhe teknika të avancuara.
Po shtu, në njoftimin e ministrit Mehaj thuhet se njësitet e tyre të kërkim-shpëtimit janë “shembull i shkëlqyeshëm i profesionalizmit dhe shërbimit vetëmohues në operacionet e shpëtimit përballë të gjitha sfidave që cenojnë sigurinë e qytetarëve të vendit pa dallim”.