Ministri i Mbrojtjes në Kosovë, Armend Mehaj, të martën e një nëntorit është takuar me parlamentarët gjermanë, anëtarët e Komitetit për Mbrojtje, Marcus Faber dhe Lars Lindemann, të shoqëruar nga ambasadori e Gjermanisë në Kosovë, Jorn Rohde.
Gjatë këtij takimi është diskutuar për situatën e sigurisë në vend dhe rajon, thuhet në një komunikatë për media.
“Fillimisht, temë diskutimi në këtë takim ishte situata e sigurisë në vend dhe rajon dhe sfidat aktuale me të cilat mund të kërcënohet paqja dhe stabiliteti i përgjithshëm”, thuhet në njoftim.
Ministri Mehaj ka informuar parlamentarët gjermanë lidhur me angazhimin në avancimin dhe ngritjen e Ministrisë së Mbrojtjes dhe FSK-së, sipas standardeve të vendeve të NATO-s, procesin e realizimit të Planit dhjetëvjeçar të Tranzicionit të FSK-së.
Pos kësaj, Mehaj i ka informuar edhe për të arriturat e deritashme në aspektin e reformës legjislative, dokumenteve strategjike, politikave integruese rajonale dhe euroatlantike, si dhe lidhur me operacionet paqeruajtëse dhe ato humanitare.
Në takim është diskutuar edhe për mundësitë e rritjes së bashkëpunimit në mes të dy vendeve, në funksion të interesave të partneritetit në fushën e sigurisë dhe mbrojtjes si dhe mundësinë e shkëmbimit të përvojave të përbashkëta në mes të ministrive dhe forcave të dy vendeve.