Ish-kryeministri i Kosovës, Isa Mustafa ka vizituar ish-krerët e Ushtrisë Çlirimtare të Kosovës (UÇK), në fillim të kësaj jave.
Lajmin e ka bërë të ditur vetë Mustafa, nëpërmjet një postimi në rrjetin social, Facebook.
“Më gëzoi fakti që i gjeta mirë, të mbushur me idealizëm; të bindur në pafajësinë e tyre dhe luftën e drejtë të UÇK-së, të gatshëm për të mbrojtur të vërtetën”, ka shkruar Mustafa gjersa bën të ditur se edhe qeverisja aktuale në vend ishte një ndër çështjet e biseduara me ta.
“Mund të jem pajtuar apo të mos jem pajtuar me njërin apo tjetrin për konceptet partiake e të qeverisjes, por është e pamohueshme trimëria dhe kontributi i tyre në mbrojtjen e popullatës në zonat më të ashpra të luftës dhe zëdhënien për masakrat çnjerëzore nga ushtria dhe shteti i Millosheviçit, ashtu siç është i pamohueshëm edhe kontributi për paqe në Konferencën e Rambujesë, në transformimin e UÇK-së menjëherë pas lufte, në negociatat e Vjenës për shtet të pavarur, në shpalljen e pavarësisë dhe në ndërtimin e institucioneve demokratike”, ka treguar ai.
Ai ka uruar që në procesin e gjykimit të tyre, të jetë drejtësia ajo që do të fitojë.
Të shtunën e 5 nëntorit, bëhen saktësisht dy vjet nga arrestimit nga Specialja të ish-krerëve të Ushtrisë Çlirimtare të Kosovës, Hashim Thaçi, Kadri Veseli, Rexhep Selimi e Jakup Krasniqi. Ata po përballen në Hagë për akuza për krime lufte.