Kryeministri i Republikës së Kosovës, Albin Kurti, ka pritur në takim ambasadorin jorezident të Japonisë për Kosovë, Akira Mizutani, i cili ishte i shoqëruar nga i ngarkuari me Punë në Ambasadën e Japonisë në Kosovë, Keisuke Yamanaka.
Gjatë takimit, në të cilin, siç bën të ditur Zyra e Kryeministrit të Kosovës, u diskutua për bashkëpunimin e deritanishëm dhe mundësitë e reja. Ndërsa, kryeministri Kurti ka shprehur falënderimin e tij për partneritetin dhe mbështetjen e vazhdueshme të Japonisë për shtetin dhe popullin e Kosovës.
“Nëpërmjet ndihmës dhe asistencës në fusha, si mjedisi, shëndetësia, siguria e ushqimit, menaxhimi i pyjeve dhe menaxhimi i katastrofave natyrore, Japonia ka prekur drejtpërdrejt qytetarët e Republikës”, ka deklaruar kryeministri Kurti.
Gjersa ka theksuar se për Japoninë, Republika e Kosovës është partneri i besueshëm në Ballkanin Perëndimor, ndërkaq për kompanitë japoneze është mundësi shumë e mirë për investime.
Ndër tjera, ambasadori japonez, Mizutani, ka thënë se Japonia e vlerëson lart qëndrimin e Kosovës ndaj luftës në Ukrainë, duke shtuar se Japonia do të vazhdojë të mbështesë Kosovën, me të cilën, ndan vlera dhe qëndrime të përbashkëta.